Vajza e Eminem, Alaina Marie Scott dhe partneri i saj prej 10 vjetësh Matt Moeller kanë kurorëzuar martesën e tyre në një ceremoni me 120 persona. Ceremonia është mbajtur të premten që lamë pas, më 9 qershor.
Alaina ka ndarë me ndjekësit në “Instagram” disa nga imazhet e ditës së dasmës, duke e quajtur atë një nga ditët më të mira të jetës së saj.
“Në këtë jetë dhe në tjetrën, shpirti im do të gjejë gjithmonë tëndin”, ka shkruar ajo. Shoqëruesja e saj e nderit ishte motra e saj Hailie Jade.
Reperi i njohur, Eminem, emri i vërtetë i të cilit është Marshall Mathers, adoptoi Scott në fillim të vitit 2000 pasi nëna e saj Dawn luftoi me përdorimin e drogës. Dawn, e cila ishte motra e ish-gruas së Eminem, Kim, vdiq në vitin 2016 nga një mbidoza.
Eminem dhe Kim kanë gjithashtu një vajzë, 27-vjeçaren Hailie Jade. Eminem është gjithashtu babai birësues i 21-vjeçares Stevie Laine Mathers.
