Vetëm pak ditë pas një prej humbjeve më të dhimbshme në botën e sportit, partnerja e Diogo Jotës ka thyer heshtjen. Me një postim të thjeshtë, por rrënqethës, Rute Cardoso ka kujtuar momentet më të bukura me futbollistin që ndërroi jetë tragjikisht, vetëm disa ditë pas dasmës së tyre.
Në një publikim në rrjetet sociale, ajo ndau tri fotografi nga dita e dasmës, duke i shoqëruar me fjalët që lanë pa fjalë ndjekësit:
“1 muaj nga ‘derisa vdekja të na ndajë’. Përgjithmonë, vajza jote e bardhë.”
Kujtimi i një dashurie të madhe, e ndërprerë para kohe, u kthye në një homazh që preku zemrat e mijëra njerëzve në internet. Martesa e tyre u kurorëzua vetëm 11 ditë para aksidentit tragjik në Spanjë, ku Diogo Jota dhe vëllai i tij, André Silva, humbën jetën në një aksident automobilistik të rëndë. Makina e tyre doli nga rruga dhe shpërtheu në flakë, ndërsa Jota ishte rrugës drejt Mbretërisë së Bashkuar.
Ai kishte kaluar ditën me familjen në një resort në Portugali dhe, në mënyrë të pabesueshme, pak orë më vonë ndodhi e paimagjinueshmja. Vetëm 28 vjeç, ai la pas një karrierë në kulmin e saj, një familje të pikëlluar dhe një dashuri të sapo nisur në martesë.
Postimi i Rutes është më shumë se një kujtim – është një dëshmi e dhimbjes, por edhe e një lidhjeje që vdekja nuk arriti ta ndante. Një fjalë, një fotografi, një kujtim – që i dha zë asaj çfarë fjalët shpesh nuk mund ta përshkruajnë.
