Sa herë që vjen, 1 Qershori na sjell dhe na përfshin në harenë e fëmijëve, e lojrave, muzikës, e festës së tyre. Eshtë dita kur ata i gjen kudo në rrugë, lulishte e parqe lojrash, të bërë tok, duke e zbukuruar kështu qytetin më shumë se kurrë më parë. Por jo të gjithë e kanë këtë mundësi, të vrapojnë e të luajnë me furi.
Në një kënd të Tiranës, shumë fëmijë, të moshave të ndryshme, në këtë 1 Qershor s’mund të dilnin jashtë mureve të një spitali. Ndaj festa për ta duhet të ndodhte pikërisht atje, tek shërbimi i onko-hematologjisë pediatrike, pranë QSUT-së, ku janë të shtruar e kurohen fëmijët me sëmundjet e gjakut.
Fushata “Ti je një luledielli” nisur pak kohë më parë, me qëllimin për t’ju ardhur në ndihmë këtyrë fëmijëve, sot mbërriti pikërisht atje, për të përmbushur misionin e saj me sukses duke pajisur Spitalin Pediatrik me aparatura te reja që do ju vinë në ndihmë këtyre fëmijëve.
‘Vodafone Albania’, një nga kompanitë e para që iu bashkua kësaj nisme përmes blerjes së 683 bluzave me logon “Ti je një luledielli”, iu bashkua sot fushatës edhe përmes ‘Fondacionit Vodafone Albania’, i cili bëri të mundur blerjen e një apature për eko kardiake, të teknologjisë më të fundit për shërbimin e onko-hematologjisë pediatrike.
Në fjalën e tij z. Mare u shpreh se: “Në një ditë si kjo e 1 Qershorit fëmijët duhet vetëm të gëzojnë e të festojnë. Jam shume i lumtur që ideja e një personi u kthye në një frymëzim për të gjithë ne. Jemi të ndërgjegjshëm që aparatura e Ekos apo dhe paisjet e tjera që ne sjellim sot për këtë spital nuk janë shpëtimi i vetëm, por janë gjithsesi një ndihmë e madhe që mbi të gjitha po jepet me gjithë zemër. Dëshiroj ta përgëzoj edhe një herë Albanën që e nisi këtë fushatë, misioni i së ciles nuk mund të na linte indifferent dhe sëbashku beme më shumë dhe jam i bindur që së bashku do bëjmë akoma më shumë në të ardhmen”
Në një ceremoni festive të organizuar për këtë rast pranë Pediatrisë së Tiranës, Iniciatorja e fushatës “Ti je një luledielli”, Albana Osmani ndau me të pranishmit momentet më të bukura, angazhimin dhe emocionin e realizimit të misionit që me aq pasion ajo dhe shumë vullnetarë arritën ta kurorzojnë sot në ditën e fëmijëve edhe me një kontribut tjetër nga kompania ‘Vodafone Albania’.
“Ti je nje luledielli” fushata e cila mblodhi rreth vetes të gjithe shqiptarët brenda dhe jashtë vendit ishte një histori suksesi i padiskutueshem, ku edhe një herë vertetoi që pasioni dhe angazhimi mund të ndryshojnë jetën e njerezve, qoftë edhe me blerjen e një bluze.
