Jo gjithmonë duhet të thuash diçka për të treguar mungesën e vetëbesimit – shpesh, janë sjelljet e vogla që flasin më shumë se fjalët. Dhe po, burrat i vënë re. Mbase nuk i analizojnë me shumë detaje, por i ndiejnë… dhe ndonjëherë, ndihen të shtyrë larg për shkak të tyre. Ja cilat janë disa nga ato sinjale “të heshtura” që një grua pa vetëbesim mund të japë – edhe pa e kuptuar.
1. Kërkon ndjesë për gjithçka
“Nuk doja të të shqetësoj… Më fal që të shkrova…”
Në fillim mund të duket e ëmbël, por nëse kërkon ndjesë për çdo veprim tëndin, ai do ta kuptojë që ti mendon se s’e meriton hapësirën tënde.
2. Pyet gjithmonë: “Dukem mirë?”
Një herë është normale. Por kur kjo pyetje përsëritet pas çdo veshjeje, fotoje apo daljeje… ai do të mendojë që nuk ndihesh mirë në lëkurën tënde.
3. Nuk shpreh mendimin tënd në biseda
Vetëm tund kokën aprovueshëm dhe i thua “Po, ke të drejtë” për gjithçka që ai thotë? Ky nuk është mirëkuptim, është anulim i vetes.
4. Krahasohesh me ish-et e tij
“Okej, ajo ishte më e gjatë se unë…”, “E di që ajo kishte më shumë eksperiencë…”
Krahasimi i vazhdueshëm tregon pasiguri dhe shpesh e vendos partnerin në siklet – ai nuk do të jetë në një garë imagjinare.
5. Reagon keq ndaj komplimenteve
Në vend që të thuash “faleminderit”, ti ia kthen: “Po çfarë thu kështu, se s’kam bërë as flokët…”
Refuzimi i komplimentit është mënyrë indirekte për të treguar që nuk e sheh veten me vlerë.
6. E kontrollon shumë telefonin e tij
Në heshtje, fshehurazi, ose me aludime si: “Kush është kjo që të shkruan kaq vonë?” – ai e sheh këtë si mungesë besimi, jo si interes.
7. Ke frikë të thuash që diçka nuk të pëlqen
Nuk thua asnjëherë “jo”, edhe kur ndihesh keq. Qëndron në situata që nuk të bëjnë mirë vetëm për të mos e mërzitur. Kjo dërgon mesazhin: “Nuk besoj se ai do më dojë, nëse e tregoj veten time të vërtetë.”
8. Shkon gjithmonë në mbrojtje
E ke të pamundur të pranosh një kritikë apo sugjerim pa u ndier e sulmuar? Kjo sjellje shpesh vjen nga pasiguria, jo nga forca.
9. Ke nevojë për konfirmim të vazhdueshëm
“A më do akoma?”, “Je i sigurt që do të rrish me mua?”, “Po sikur të gjesh dikë më të mirë?”
Pas një kohe, këto pyetje nuk duken më të ëmbla – por lodhëse
10. E tepron me përpjekjet për të qenë “e përkryer”
Nga grimi i ekzagjeruar tek kontrolli i çdo detaji të takimit, përpjekja për të mos pasur asnjë të metë mund ta bëjë të mendojë që ti nuk ndihesh e mjaftueshme ashtu si je.
Në fund të ditës…
Vetëbesimi nuk vjen nga ajo çfarë të thonë të tjerët, por nga mënyra si e trajton veten. Dhe e vërteta është që një burrë që vlen – nuk kërkon përsosmëri, por autenticitet. Dhe ti je më shumë se mjaftueshëm.
