Moderatorja e njohur Aida Shtino ka zbuluar sl fundmi detaje lidhur me karrierën, por edhe me jetën personale. Në një intervistë për “TAR” me Jonida Aliçkollin në podkastin “Ku ke humbur”, ajo rrëfeu dhe arsyen pse u mbyll emisioni “Njerëz të humbur”.
“Në fakt, emisioni i fundit është transmetuar në RTSH, në Radio Televizionin Publik Shqiptar. Ishte viti 2014 dhe emisioni i fundit ishte një nga më të sukseshmit ku atë natë tre raste kemi pasur dhe të treja rastet ne i kemi gjetur. Të nesërmen mua më thërrasin në drejtori dhe më thojnë që emisoni do të mbyllet, sepse nuk ka fond. Pa shkak. Edhe nuk e kam thënë shpeshherë, sepse intervistat e mia kanë qenë shumë të pakta në media, por po e them me ty këtu se kanë kaluar vite dhe ka qenë si një fëmijë që unë e rrita me shumë mund e sakrifica dhe arriti të bësheshe një institucion. Dhe në momentin që më thanë që shiko se do të fiken dritat, nuk do të jeni më, aty ishte sikur diçka u venit. Kam marrë makinën pastaj dhe mendoja si do t’ja thoja stafit se ne ishim të tërë të lidhur. Nëse ndryshonim televizion, i merrja të gjithë me vete si regjisor, si montazhier, si gazetarë, të gjithë ishin grup. Lëvizjet nuk kanë qenë për shkakun tim, por siç dihet në media. Dhe kam marrë makinën vetëm edhe kam ecur dhe ka qenë një ditë shumë e mërzitshme për mua. Jam mërzitur shumë.
Duhet ta suportoja njëherë me veten time dhe pastaj t’ja transmetoja edhe stafit. Ajo që më ka dhembur më shumë ishte sesi do t’ja thoja familjarëve që na shikonin si një dritare ku ata kërkonin fëmijët e tyre. Pastaj më është dashur të largohem nga media. Të qetësoja veten time. Të shikoja ku isha. Se edhe në ëndërr më dilnin. Shikoja ëndrra me njerëz që kërkoja. Ishte bërë pjesë e jetës sime. Ishte e pamundur të shkëputesha, sepse njerëzit më përndiqnin”, ka thënë ajo.
