Gjatë ditëve të fundit rrjetet sociale janë përfshirë nga një sfidë e re, sidomos ‘Instagram-i’ dhe ‘Facebook-u’. ’10 Year Challenge’ i kërkon përdoruesve që të publikojnë një foto të para një dekade dhe një foto të këtij viti, për të parë se si kanë ndryshuar përgjatë kësaj kohe. Një numër shumë i madh njerëzish kanë pranuar sfidën duke publikuar foton me mbishkrimin përkatës. Sfida nuk ka kaluar pa u komentuar nga përdoruesit e rrjeteve sociale, të cilët janë shprehur se kjo mund të jetë një mënyrë që po përdorin krijuesit për të marrë të dhënat personale. Këto dyshime janë shtuar sidomos pas një artikulli të publikuar në “Wired”, nga Kate O’Neill, e cila tregon se ’10 Year Challenge’ është më shumë se një lojë argëtuese për t’u ndarë me miqtë.
“Imagjinoni nëse ju duhet të ndërtoni një katalog të njohjes së fytyrës, bazuar mbi ndryshimet që kanë pësuar njerëzit me kalimin e moshës. Patjetër do t’ju duhej një bazë të dhënash e madhe, e mbushur me foto të hedhura nga vetë njerëzit dhe për më tepër do të ishte perfekte nëse do të dinit se fotot kanë një distancë 10-vjeçare mes njëra tjetrës.”-thotë O’Neill.
Kujtojmë se kohët e fundit ‘Facebook’ është duke punuar që ta bëjë njohjen e fytyrës një opsion të përhershëm. Nëse e keni vënë re, sa herë që ju bëjnë “tagg” në një foto ose kur jeni pjesë e postimit të një personi tjetër, ‘Facebook-u’ ju njeh automatikisht dhe ky është rezultat i të dhënave që ka për ju./revistawho.com
