Nëse do të na duhej të gjenim shembullin perfekt për lidhjen nip-gjyshe, nuk do të gjenim një më të mirë se sa ai i Bes Kallakut dhe Ijes së tij. Në çdo dalje publike Besi ka gjetur mënyra nga më të ndryshmet për ta falënderuar gjyshen e tij për çdo gjë. Ditën e sotme ai ka një arsye më shumë për ta falenderuar e uruar Ijen nga zemra.
“Ija ime, nuk ta uroj dot ditëlindjen duke të thënë ‘edhe 100’ sepse do ishte e pamundur. Veç do të të them 1000 falenderime qe më ke rritur, 1000 falenderime që gatuan bukën më të shijshme ne botë, 1000 falenderime që për çdo bekim që më ke dhënë, për çdo rrënjë domateje që kemi mbjell bashkë, për djathin, gjalpin, reçelin, mullagat, zambakët e kurorat me luledele mbi kokë. Edhe në pastë njeri që më ka mësuar të jem vetvetja edhe i natyrshëm, ajo je ti. 1000 falenderime që jetën e sheh vetëm me ngjyra, pozitivitet edhe u tregove të gjithëve që ‘robi plaket kur do vet’. Zemra jote është tempull dashurie për fëmijët dhe të gjithë nipërit e mbesat. T’i puth duart o Ije. Të duam shumë. Edhe lavdi Zotit që do jetosh ditën të shohësh fëmijën tim, e ta vesh ne gjumë ‘fli se gjumin ta ruan Ija’ sikur mua dikur”, – ka shkruar Besi për gjyshen.
Këtij urimi kaq special nuk mund t’i shtohet asgjë më tepër, por vetëm duhet thënë se dashuria për gjyshet është një ndër më të mëdhatë në jetë!
