Ndoshta vërtetë pica të bën mirë për shëndetin. Me siguri kjo qëndron të paktën në rastin e Kirk Alexander, një 48-vjeçar të cilit pica i shpëtoi jetën. Alexander vuan nga një sëmundje e rëndë dhe është i detyruar të bëjë një jetë të tërhequr. Një nga kënaqësitë e vogla që mund të shijojë, është të porosisë rregullisht një picë në rrjetin e dyqaneve “Domino” në New York. Dhe ishte pikërisht heshtja e tij e gjatë që vuri në alarm punonjësit me menaxherin e dyqanit. Kjo i shpëtoi jetën! Prej më shumë se 10 vjetësh, Alexander porosit picë apo edhe pjata të tjera në dyqanin afër shtëpisë. Shoferët e njohin mirë dhe ndalojnë gjithmonë tek ai për të shkëmbyer dy fjalë. Ishin ata që i thanë menaxherit se kishte kaluar shumë kohë nga porosia e fundit e Alexander. Ata kontrolluan në kompjuter dhe panë që klienti i tyre nuk bëhej i gjallë prej 11 ditësh. Më pas dërguan një shofer për të parë nëse ishte gjithçka në rregull. E në fakt nuk ishte aspak. Dritat në shtëpi ishin ndezur por askush se hapte derën. Në këtë moment ata lajmëruan policinë. Pasi policët rrëzuan derën lajmëruan menjëherë ambulancën. Burri kishte pësuar një goditje, ishte rrëzuar përtokë e nuk ngrihej dot më. Tani ai është shtruar në spital dhe punonjësit e picerisë shkojnë për ta vizituar. Ata u vlerësuan edhe me një shpërblim nga kompania e tyre për ndjeshmërinë dhe gatishmërinë ndaj klientëve, një udhëtim në Las Vegas.
Dev by Techzero1.com