Një talent i ri shqiptar ka ngritur lart emrin e vendit në arenën ndërkombëtare të dijes. Loris Qosja, vetëm 15 vjeç, është shpallur fitues i Olimpiadës Ndërkombëtare të Matematikës, e zhvilluar në Orlando të Shteteve të Bashkuara të Amerikës.
Adoleshenti nga Cërriku, nxënës i klasës së 9-të, nuk u ndal vetëm me këtë sukses, pasi arriti të renditet edhe në vendin e tretë në Olimpiadën e Kimisë, duke treguar aftësi të spikatura edhe në shkencat natyrore.
Pas këtij rezultati qëndron një përkushtim i jashtëzakonshëm. Loris ka punuar intensivisht me mësuesen e tij, Flutura Hoxholli, duke ushtruar jashtë orarit mësimor dhe edhe gjatë pushimeve. Ai i kushton matematikës mesatarisht 6 deri në 8 orë në ditë, një disiplinë që e ka kthyer në pasion dhe forcë të tijën.
Udhëtimi drejt SHBA-ve u bë i mundur falë mbështetjes së Bashkisë Cërrik, ndërsa pjesa tjetër e shpenzimeve u përballua nga familja e tij, e cila ka qenë gjithmonë pranë talentit të ri në rrugën e tij drejt suksesit.
