Në një rrëfim të sinqertë për jetën personale, këngëtari i njohur kosovar Blero Muharremi ka folur për marrëdhënien e tij me partneren Eronita dhe diferencën e tyre 17-vjeçare në moshë, një temë që shpesh ka nxitur diskutime në rrjetet sociale. I ftuar në emisionin “Rudina” në Tv Klan, artisti theksoi se përtej komenteve dhe paragjykimeve, ajo që ka rëndësi reale në një çift është mënyra se si dy njerëz funksionojnë së bashku në jetën e përditshme dhe niveli i pjekurisë që ndajnë mes tyre.
Gjatë bisedës në studio, moderatorja Rudina Magjistari ngriti pikërisht këtë temë, duke thënë: “Një nga gjërat që është komentuar në lidhjen tuaj është edhe diferenca në moshë… është shumë individuale mendoj këndvështrimi për diferencën në një çift, se varet se çfarë mendon të rëndësishme në atë që i lidh dy njerëz bashkë. Ju keni 17 vite diferencë”.
Blero u shpreh pa hezitim se për të diferenca në moshë nuk është pengesë, madje në disa raste mund të funksionojë natyrshëm në marrëdhënie. Ai deklaroi fjalë për fjalë: “Për ne meshkujt është më mirë, në kuptimin që ke një partnere që është më e re dhe fizikisht është më mirë. Realisht unë mendoj që mashkulli duhet të jetë pak më i moshuar. Ndoshta ne kemi pak më shumë. Kjo është e natyrshme. Ama dashurisë nuk i dihet. Ne kemi 17 vite diferencë ama, kur të ulesh me ne mendon që jemi në të njëjtën moshë, nga muhabetet që bëjmë dhe mënyra se si jemi me njëri-tjetrin”.
Më tej ai shtoi edhe një tjetër vlerësim për partneren e tij: “Eronita edhe pak i mbush 30 vjet dhe për moshën që ka është jashtëzakonisht e pjekur. Nuk mund të funksiononte me mua nëse nuk do të kishte qenë e pjekur në atë nivel”.
Deklaratat e tij kanë rikthyer edhe një herë debatin mbi diferencat e moshës në marrëdhënie, një temë që shpesh ndan opinionin publik mes paragjykimit dhe pranimit. Por për Bleron, përgjigjja duket e thjeshtë. Në fund të fundit, ajo që mban një çift bashkë nuk janë vitet në letër, por mënyra se si dy njerëz e jetojnë dhe e kuptojnë njëri-tjetrin.
