Këngëtarja shqiptare Enisa ka prekur ndjekësit e saj me një rrëfim të sinqertë pas një periudhe tepër të vështirë shëndetësore, e cila e mbajti larg jetës normale për disa javë.
Artistja ka zbuluar se fundi i këtij viti ishte larg asaj që kishte imagjinuar, pasi u përball me një gjendje të rënduar gripale që e la pa fuqi dhe e detyroi të qëndronte e izoluar. Ajo e përshkruan këtë përvojë si një nga momentet më të errëta që ka kaluar, ku mendimet për të mos ia dalë nuk munguan.
Përmes një postimi në rrjetet sociale, Enisa ndan reflektime të thella mbi shëndetin, frikën dhe mirënjohjen për jetën, duke theksuar se kjo periudhë i ndryshoi tërësisht këndvështrimin mbi atë që ka vërtet rëndësi.
“Jashtë për herë të parë pas 3 javëve më të këqija të jetës sime! Kam parë tmerr me gripin A (i njohur edhe si varianti më i keq i gripit). Shumë ditë mendova se nuk do t’ia dilja, ishte shumë keq, por kisha Zotin në krah. Jeta është e frikshme kur e vetmja lëvizje që mund të bësh për javë të tëra është nga krevati në divan, por më ndryshoi këndvështrimin në gjithçka. Kur nuk ke shëndetin, asgjë tjetër s’ka rëndësi. Më kujtohet kur gjithë çfarë i thosha vetes ishte që dua vetëm të jem sërish e shëndetshme. Çfarë mënyre e papritur për të mbyllur vitin. Jam shumë mirënjohëse për këtë jetë dhe dua t’i marr më të mirën. Faleminderit kujtdo që më kontaktoi, i kam lexuar të gjitha mesazhet tuaja dhe ju vlerësoj shumë! Mezi pres që të vijë 2026!”, shkruan Enisa në “Instagram”.
Këngëtarja, e cila jeton dhe vepron në Shtetet e Bashkuara të Amerikës, nuk është hera e parë që përballet me situata të rrezikshme për shëndetin. Kujtojmë se në gusht të vitit 2023, ajo ishte e përfshirë në një aksident të rëndë automobilistik, kur një mjet që lëvizte me shpejtësi të lartë u përplas me makinën ku ndodhej.
