Tre vite pas përçarjes që ekspozoi publikisht tensionet brenda familjes mbretërore britanike, marrëdhënia mes dy vëllezërve më të famshëm të monarkisë duket se nuk ka ndryshuar. Autori dhe komentatori i njohur për çështjet mbretërore Omid Scobie ka ndarë së fundmi vlerësimin e tij për raportin mes Prince Harry dhe Prince William, duke sugjeruar se dinamika mes tyre mbetet praktikisht e njëjtë si tre vite më parë.
Sipas tij, përpjekjet për një pajtim të mundshëm nuk kanë sjellë rezultat. Duke reflektuar mbi situatën, Scobie shpjegon se: “Dinamika mes dy vëllezërve është pothuajse e njëjtë si tre vite më parë.” Ai shton se në vitin 2023, Harry ende shpresonte se do të kishte një moment përballjeje me vëllain e tij për të diskutuar hapur mosmarrëveshjet e akumuluara ndër vite dhe për të gjetur një mënyrë për të ecur përpara.
Por sipas analizës së tij, edhe në vitin 2026 situata mbetet e pandryshuar. “Pritshmëritë dhe dëshirat e Harry-t mbeten të njëjtat, por asnjëra prej tyre nuk është përmbushur,” vëren Scobie. Marrëdhënia e tensionuar mes Dukës së Sussex-it dhe Princit të Uellsit daton të paktën që nga viti 2020, kur Harry dhe bashkëshortja e tij, Meghan Markle, vendosën të tërhiqeshin nga rolet e tyre si anëtarë aktivë të familjes mbretërore.
Që atëherë, tensionet u thelluan edhe më shumë pas intervistave të shumta publike, dokumentarit në Netflix dhe publikimit të autobiografisë së Harry-t. Scobie pretendon gjithashtu se Harry ka bërë disa përpjekje për të kontaktuar vëllain e tij, si drejtpërdrejt ashtu edhe përmes miqve të përbashkët, por nga ana e William nuk ka pasur të njëjtin reagim. Ndërsa disa sinjale më të ngrohta janë vënë re në raportin e Harry-t me babanë e tij, King Charles III, marrëdhënia mes dy vëllezërve, sipas vëzhguesve të familjes mbretërore, mbetet ende e ngrirë.
