Të jesh prind i tri vajzave, ashtu siҫ është një lumturi e pakrahasueshme, është edhe një sfidë e madhe për ҫdo kohë. Bekimin që Zoti ua ka dhënë trefish, ҫifti i njohur Koҫo dhe Brixhida Kokëdhima e kanë gëzuar bashkë me 35 vitet e martesës së tyre. Të ftuar sot në “Rudina” për të rrëfyer më shumë për vitet e gjata bashkë, sekretin që i mban gjithmonë të lidhur, Koҫo dhe Brixhida kanë prekur edhe disa detaje sa u përket tri bijave të suksesshme, të cilat ҫdo ditë e më shumë i bëjnë të lumtur e krenarë: Besa, Bora dhe Era janë bekimi i tyre më i madh. Sot, kur të tria kanë fituar pavarësi dhe investojnë në profesionet e tyre, për Koҫon dhe Brixhidën janë një ndihmë më shumë, një mbështetje më e madhe shpirtërore, e cila nuk mund të krahasohet me asgjë tjetër në botë. Por në fillim nuk ka qenë kështu. Të paktën jo për Besën, vajzën e madhe të ҫiftit Kokëdhima. I pyetur si është të jesh baba i tri vajzave, Koҫo Kokëdhima, i ndier në “faj”, tregon se ndjesinë dhe egon mashkullore shqiptare për të pasur një djalë e ka përjetuar edhe ai para se në jetë të vinte fëmija i parë: “Më duhet ta pranoj se, fillimisht, kur ne prisnim Besën, unë isha pak i ndikuar nga mjedisi, nga kultura jonë. Do më pëlqente të ishte një djalë… por pasi lindi Besa, fëmijërinë e saj e kemi përjetuar shumë lumturisht të dy” – tregon Koҫo Kokëdhima duke kujtuar me nostalgji fëmijërinë e vajzës së parë. Dhe kur pas saj, ata do të bekoheshin sërish me një vajzë, babai këtë herë do të lumturohej dyfish e më vonë, trefish, edhe me lindjen e Borës: “Kur lindi Bora, unë nuk e kisha më problem këtë gjë, sepse kam qenë i plotësuar në familjen time. As me ardhjen në jetë të Erës nuk e kisha më problem pasjen e një djali… Jam i lumtur.” Besa, si vajza e madhe e shtëpisë, ka lidhje unike me të atin. Këtë e thotë edhe në një mesazh që i dedikon atij: “Unë kam një marrëdhënie shumë të mirë me tim atë. Ai ka ditur të jetë një person që më ka lënë të lirë të bëj atë që dua, ka qenë një mentor shumë i mirë që më bën të ndihem e sigurt…”.
Burimi: Class
