Një histori shumë e dhimbshme është trajtuar në rubrikën ‘Shihemi në gjyq’ në “E diela shqiptare”, ku Valdetja nga Shkodra i kërkonte të atit të pranonte në shtëpi atë dhe djalin 13-vjeç, sepse do të divorcohej nga bashkëshorti. I ati, Cafi, së bashku me motrat e tij ia kishin gjetur burrin me shkuesi Valdetes 13 vite më parë, por 4 muaj pas lindjes së djalit, bashkëshorti, Dëfrimi, u largua drejt Greqisë pa thënë asgjë. Tre vjet ai ruajti kontaktet me Valdeten, duke i premtuar se do të kthehej me para, do të ndërtonin shtëpi dhe do të rrisnin djalin të lumtur por 10 vite më pas, ndërsa Valdetja dhe djali e kanë pritur të kthehet, Dëfrimi është zhdukur dhe nuk ka kontaktuar më me gruan e tij, apo me ndonjë nga familjarët.
Gjatë këtyre 13 viteve në pritje, Valdetja në pamundësi për të jetuar në shtëpinë bashkëshortore, që është në gjendje të mjerueshme, ka jetuar me prindërit e saj të moshuar, në një shtëpi një dhomë e një kuzhinë. Por pasi i rrëfeu prindërve vendimin për t’u ndarë nga Dëfrimi dhe për t’i dhënë djalit mbiemrin e saj, babai nuk pranon ta mbajë në shtëpi, ‘sepse është turp dhe kështu e ka zakoni’ që të rikthehet në trungun e familjes së origjinës dhe të ndryshojë mbiemrin, duke rimarrë atë të vajzërisë. E gjithë familja është në gjendje shumë të vështirë ekonomike, Valdetja siguron vetëm 16 mijë lek të vjetra në muaj në sajë të asistencës dhe 72-vjeçari e ka të pamundur të mbajë nipin dhe vajzën me të ardhurat minimale që zor se i sigurojnë jetesën. Mes lotësh dhe shumë thirrjeve të dëshpëruara të Valdetes drejtuar të atit për ta mbajtur në shtëpi, Cafi pranoi, me një kusht që Valdetja të kishte trungun e saj familjar, të shkëputej nga ai i familjes dhe në këtë mënyrë mund t’i japë të birit mbiemrin e saj, në të kundërt do t’i hapeshin probleme me dy djemtë e tjerë, që janë të aftë të mbajnë vetëm familjen dhe i kanë sytë tek pasuria e babait. “Ma hoqe lakun prej fyti për divorcin e vajzës,” falënderoi mes lotësh Cafi Eni Çobanin, që pranoi të ndjekë procesin e divorcit të Valdetes me shpenzimet e saj personale. / anabel.al
