Pas dhimbjes shkatërruese të humbjes së vogëlushes së saj Indila, e cila u nda nga jeta vetëm 9 muajshe, showgirl-i Claudia Galanti e ka gjetur forcën për të vazhduar përpara, për dy fëmijët e saj të tjerë. Megjithatë dhimbja e bukuroshes italiane nuk është zhdukur e kurrë nuk do të harrohet.
Ajo e ka kujtuar me një dedikim prekës në rrjetet sociale: “Bija ime, më kujtohet kur të mora për herë të parë në krahët e mi, ishe kaq e vogël dhe e pambrojtur, një princeshë e vogël vetëm për t’u dashur e për t’u mbrojtur. Më e bukur se të gjithë, thoja sa herë që të shikoja në sy. Ishe një engjëll në jetë por Zoti deshi të të dërgonte sërish në vendin e duhur për ty, atje ku nuk ka ligësi, falsitet. Në vendin e pastër, Parajsën e atje me ty ka shumë engjëj të tjerë. Sot do të kishe mbushur 3 vjeçe e ngaqë nuk po të shoh të rritesh, më shkatërrohet shpirti, mendja dhe trupi por e vogla ime ti do të jetosh përgjithmonë në zemrën time. Mbaj mend çdo lëvizje të vogël që bëje kur ishe brenda meje deri kur linde, dhe çdo gjest tëndin më pas. Janë kujtime që do t’i ruaj gjithnjë, deri ditën që do të bashkohem e kur më në fund të qëndrojmë bashkë. Të dua zemra e mamit. Të mbajta dorën për kaq pak kohë por do të të mbaj në zemër përgjithmonë”.
Vogëlushja u nda nga jeta për shkak të një infeksioni bakterial dhe nëse do të jetonte, do ishte duke festuar ditëlindjen e saj të 3-të./ revistawho.com
