Elvana Gjatës i grabisin 3 mijë euro dhe celularët, policia fsheh ngjarjen

Këngëtarja Elvana Gjata në muajin qershor të këtij viti ka rënë pre e një grabitjeje. Lajmi raportohet sot nga gazeta “Panorama”. Megjithëse kanë kaluar muaj nga ngjarja, ky lajm është mbajtur i fshehtë nga policia, ndonëse Elvana ka bërë kallëzim. Gjykata e Tiranës shpalli fajtor për vjedhje, mbajtje pa leje të municioneve ushtarake si dhe kultivim të lëndëve narkotike, shtetasin Ervin Tahiri. Tahiri u dënua me 3 vjet e gjysmë burg por përfitoi ulje dënimi me 1\3 nga gjykimi i shkurtuar. Siç shkruan “Panorama”, në kallëzimin e saj Elvana Gjata ka pohuar se ka hapur një biznes për shitje fustanesh nusërie në rrugën “Sulejman Delvina” në Tiranë. Në datën 22 qershor rreth orës 18:00 ajo ka qenë në këtë biznes duke u marrë me ndriçimin e katit të dytë me një grup pune. Kur është futur në dyqan, në katin e parë sipër tavolinës kishte lënë dy celularët e saj iPhone 6 dhe Samsung edge S6 si dhe çantën e dorës. Vetë ka hipur në katin e dytë. Në orën 18:30 ajo ka dëgjuar një zhurmë, sikur u mbyll dera në katin e parë. Menjëherë ka zbritur poshtë dhe ka vënë re se dy telefonat e saj mungonin. Ka kontrolluar çantën mbi tavolinë dhe ka konstatuar se i mungonin një shumë prej 3 mijë eurosh. Ka njoftuar punonjësit e sigurisë së lokalit dhe policinë. Nga hetimet rezultoi se autori ishte Ervin Tahiri në banesën e të cilit u gjetën 1220 euro dhe portofoli i Elvana Gjatës i markës “Michael Kors”. Brenda portofolit janë gjetur edhe leja e drejtimit të këngëtares si dhe karta e kreditit.