E ftuar këtë pasdite në studion e “Rudina”, në Tv Klan, Valbona Selimllari ka folur edhe për angazhimin e saj të ri pranë bashkisë së Tiranës. Propozimin e kryetarit të Bashkisë, Erion Veliaj, pak muaj më parë, ajo nuk mund ta refuzonte, sepse do të ishte pranë fëmijëve – pika e saj e dobët dhe dashuria më e madhe.
Të gjithë miqtë e afërt të Bobit, e dinë që ajo është gjithmonë gati kur është fjala për të ndihmuar dhe sa herë ka mundësi ta bëjë, por ky ishte rasti kur do të kontribuonte edhe intitucionalisht, ndaj pse jo?
Pozicioni si Këshilltare për Çështjet Sociale pranë Bashkisë së Tiranës dhe kontakti i drejtpërdrejtë me fëmijët i jep Valbonës më shumë hapësirë për të ndihmuar, ndaj sapo iu bë propozimi, e pranoi me shumë kënaqësi: “Ishte një propozim fare i rastësishëm, që lindi nga një bisedë mes mikeshash. E pranova me shumë kënaqësi. Jam e angazhuar personalisht edhe vetë sa herë kam mundësi të jap një kontribut, e bëj pa bërë bujë, por kur më thanë, m’u duk sikur do e vazhdoja nismën. Mua më pëlqen të punoj me njerëz të suksesshëm dhe propozimi që më bëri Erioni më jep më shumë hapësirë për të ndihmuar më shumë…” – tregon Valbona.
Prej pak kohësh ka nisur një projekt me fëmijët e rrugës, të cilin, siç tregon Valbona, e kishte nisur para se të pranonte këtë pozicion, por me këtë rast, vëmendja publike bëhet edhe më e madhe dhe angazhimi po ashtu: “Unë kur kam mundësi të ndihmoj, e bëj edhe pa e bërë publike, siç e thashë edhe më sipër, por në rastin konkret është një mesazh më shumë sesa një nismë personale, sepse dua më shumë që bashkë me ne të bashkohen edhe të tjerë…”
Vështirësitë në këtë pozicion, natyrisht edhe Valbona i ka vënë re që në fillim. Një prej më të mëdhave është paragjykimi që duhet luftuar çdo ditë, megjithatë, me nisma të tilla sensibilizimi dhe me strukturat e bashkisë, Valbona beson se e ardhmja e këtyre fëmijëve do të jetë më e mirë./Class.al
