Një modë e lindur në Rusi që po përhapet në të gjitha kontinentet falë internetit, është shndërruar në një sfidë të mirfilltë midis djemve dhe vajzave që ndoshta për të luftuar mërzinë, bëjnë gjithçka që i urdhërojnë administratorët e grupimeve në rrjetet sociale. Pasi një adoleshent pranon të bëhet pjesë, duhet të pranojë një sfidë në ditë, e nëse tenton të heqë dorë më pas, kërcënohet bashkë me familjen. Disa sfida janë të padëmshme si të qëndrosh pa folur për një ditë të tërë apo të shohësh një film horror natën në errësirë. Mirëpo disa të tjera janë tejet të rrezikshme edhe për jetën. Për shembull të kalosh tek shinat e trenit, t’i bësh vetes një shenjë në trup ose figurën e një balene. “Loja” e rrezikshme e nisur në Rusi është përhapur e deri më tani ka marrë 130 jetë të rinjsh, të gjithë të vetëvrarë për motive në dukje të pashpjegushme. Sepse sfida më ekstreme është pikërisht vetëvrasja. Ky është rasti i një 15-vjeçareje nga Rusia, Yulia Konstantinova, e cila pasi publikoi në rrjetet sociale imazhin e një balene të kaltër shoqëruar me mbishkrimin “ky është fundi”, u hodh nga kati i 14. Raste të ngjashme janë regjistruar edhe në Britaninë e Madhe, Spanjë, Meksikë, Brazil, Kolumbi dhe Kili. Duket absurde por adoeleshentët janë vetëvrarë për hir të lojës. Kjo përfshin kryesisht të rinj të vetmuar, në depresion dhe të brishtë, me dëshirë për të tërhequr vëmendjen e për t’u ndjerë të rëndësishëm, të gatshëm për veprime ekstreme./ revistawho.com
