Një intervistë e njërës prej konkurrenteve të këtij edicioni të “Dancing With The Stars”, ka ngjallur pakënaqësinë e fitueses. Kështu një konflikt virtual ka ndodhur sot midis Dorina Memës, e cila mori kupën e këtij spektakli, dhe finalistes Ambra Meda. Ambra ka dhënë një intervistë për një të përditshme, e cila doli në treg me titullin “Fitoren e meritoja unë”. Ky titull nuk i ka pëlqyer aspak sportistes e cila ka reaguar përmes një statusi të ashpër në rrjetin social “Facebok”. “Postet e Ambrës: komentet pas shpine e buzeqeshjet e komplimentet para fytyrës na dhimbsej, e mbeshtetëm të gjithë, si gjithë shqiptarët që kauzat na prekin. Më kujtohej balerini i saj kur thoshte do Zoti shkojmë në finale, kur ndërronte lëvizjet se Ambra si bënte dot, ai e mbante me pekule dhe në ka merite që Ambra hyri në finale është e Jurgenit por këtu konkurronin Vipat jo balerinët… E dashur Ambra mos kërko me tepër nga Zoti se ç’të ka dhënë, danci është zhanër sportiv dhe fiziku yt nuk ishte gati për këtë sprovë. Për mëshirë unë ta fal kupën se Zoti për mua ka shkruajtur fitore të tjera: të jap një këshillë, unë që sot po korr fitore kam pranuar më përpara humbje, mësohu të pranosh të vërtetat se fitoret fallco të çojnë në gremina…”, ka shkruar Dorina. Mirëpo me sa duket, fituesja nuk e ka parë reagimin e vetë Ambrës lidhur me titullin e intervistës së saj. Ambra deklaron se titulli i vënë në gojën e saj është egoist, dhe nuk e ka thënë në atë kuptim. Ja çfarë shkruan ajo: Dje dhashë një intervistë dhe sot çuditem me titullin kaq egoist :”Ambra Meda ,fitoren e meritova une “. Eksperienca më e bukur e jetës time është “Dancing With The Stars” dhe kur mora pjesë synimi im ishte të kënaqesha kryesisht . Unë nuk isha perëndesha, më e mira e të mireve dhe nuk mund të them se e meritova unë fitoren. Të gjithë jemi munduar e kemi konkurruar fort dhe do donim të ishim fituesit por fundja një do ta merrte atë trofe. Per mua është fitore të kërcesh e marrësh pjesë në një sfidë kërcimi pas gjithë atyre vështirësive. Të takosh e bësh miq yje që më parë i ndiqje me adhurim nga ekrani. Fitorja ime është të jem mirë dhe të jetoj jetën si çdo njeri. Gazetarët shkruajnë titujt sa më të goditur për të tërhequr lexues, këtë e kuptoj por ju lutem o gazetarë të dashur mendoni se dhe ne qe i lexojmë ndihemi keq për gjëra që nuk i kemi thënë në atë kuptim!
