Një vogëlush shqiptar, i cili jeton në Bern të Zvicrës së fundmi ka ‘pushtuar’ mediat zviceriane. 3-vjeçari Ardi Klimenta nga Kosova është bërë i njohur për pozat e tij tejet të bukura dhe veshjet e veçanta. Prindërit e tij janë njerëz të thjeshtë dhe shprehen tepër entuziastë për të voglin e tyre. “Ardi më shumë se gjysmë ore e kalon duke bërë fotografi, pjesën tjetër të ditës e kalon duke luajtur”, – thotë Kushtrimi, babai i tij për gazetën zvicerane ‘20min.ch’.
33-vjeçari thotë se ai mundohet që çdo gjë të shkojë mirë për djalin e tij. “Për ne si prindër kjo është gjëja më e rëndësishme, që Ardi të jetë i lumtur”, – theksoi ai. “Kur ai nuk dëshiron të pozojë, ne e respektojmë dëshirën e tij”. Ai tregon se marka të njohura janë të interesuara për ta bërë djalin e vogël modelin e tyre dhe se ai i ka rrugët e hapura në biznesin e modës në të ardhmen, por sidoqoftë ata do të respektojnë dëshirat e Ardit për të ardhmen.
