Zemra e Juglindjes, na bën apel për të “takuar një histori emigranti” në një #DITEAMERIKANE. Kjo fundjavë, prej të shtunës (Dt 21/10) në mbrëmje deri në përfundim të së dielës (Dt 22/10), do të sjellë aromë amerikane nga “Rock on the Stone”, në Pazarin e Korçës. Korça së hershmi e hapur me botën, më së shumti e lidhur me Amerikën e me kulturën e saj, si dashamirës të pandreqshëm të perëndimit ndër vite, pret “Rock on the Stone” si tribut i difuzionit kulturor amerikan në kulturën vendase.
Në këtë aktivitet, pjesëmarrës do të jenë përfaqësues të institucioneve të rëndësishme,
e personalitete të qytetit. Ky, aktivitet, ka gëzuar mbështetjen e partnerëve të rëndësishëm, si Bashkia Korçë, AADF e TID Korça, AKT dhe sigurisht, mbështetjen e sponsorit gjeneral të projektit, ABI Bank.
Aktiviteti do të çelet në mbrëmjen e të shtunës me një koncert nga e ftuara speciale Rovena Dilo, me pjesëmarrjen e këngëtarëve: Rubin Kaso dhe Bledi Polena, shoqëruar nga Grupi Korçar, në Pazar, duke krijuar një atmosferë të ngrohtë për të pritur një të dielë edhe më dinamike, plot aktivitete me aromë Amerike.
Në datën 22/10, Pazari i Korçës është konceptuar në formën e një lagjeje tipike amerikane, ku gjenden, restorante, bare, por dhe “Kuzhina e Hapur” ku personazhe të njohur do të gatuajnë petulla amerikane, në tinguj rock n’roll e jazz nga Rovena Dilo & band.
Para se të mbërrijmë aty, në rrugicat e Pazarit, na mirëpresin histori emigrantësh, figura të famshme ose jo. Të gjitha këto kujtime me aromë amerikane të Korçës, të ruajtura ndër vite, i gjejmë pikërisht këtu, në ekspozitën e materialeve relike të vendosura në Pazar, në kuadër të “Rock on the Stone”, ku dhe mund të dëgjojmë historitë nga vetë protagonistët apo pasardhësit e tyre, në forumin e organizuar me po të njëjtën tematikë. “Tako një histori emigranti” atëherë, në ekspozitën e pasur me materiale me vlera historike e kulturore, të mbledhura për merak nga koleksionisti korçar.
Një Korçë të tërë, në miniaturë, ashtu vitale e diverse, mund ta gjeni tek “Pazari i Korçës”, ku nën tingujt amerikan do të shijoni traket ritmike mbi kalldrëm. Le t’i lëmë për momentin ëndrrat mënjanë, e le të behemi pjesë e një dite të veçantë amerikane, në vatanin kulturor të Shqipërisë. Ruaj datën! Tako një histori emigranti! “Rock on the Stone”, 21-22/10, Pazari, Korçë.
