Fushata sensibilizuese “TI JE NJË LULEDIELLI” e nisur nga moderatorja bukuroshe Albana Osmani ka patur një sukses të jashtëzakonshëm në të gjithë Shqipërinë. Ashtu siç dihet tashmë, kjo fushatë ka si qëllim mbledhjen e fondeve nga shitja e disa produkteve që mbajnë logon e lulediellit për të ndihmuar të gjithë fëmijët që janë prekur nga sëmundjet e gjakut dhe trajtohen në shërbimin e onkohematologjisë pranë QSUT-së. Në disa postime në rrjetin social ‘Instagram’ Albana la të kuptohet se kjo fushatë mund të marrë përmasa më të mëdha duke u shtrirë ndërkombëtarisht. Për të mësuar diçka më shumë revistawho.com kontaktoi drejtpërdrejtë me iniciatoren e kësaj fushate, Albana Osmani. Ajo na tregoi se shpreson shumë që fushata të shtrihet në gjithë botën me dy produkte: bluzat luledielli dhe ‘New App Sunflower Game’. Në lidhje me këtë aplikacion të ri Albana tha se: ”Do të përfshijë të gjithë Shqipërinë në një promovim të madh. Kushdo në gjithë botën që do të shkarkojë këtë aplikacion në celularin e vet do të mësojë më shumë për vendin e Nënë Terezës dhe bukuritë natyrore dhe vlerat kulturore. Ky aplikacion është dedikuar posaçërisht për Spitalin Rajonal të Kukësit dhe çdo shkarkim i aplikacionit do të shkojë për këtë kauzë”. Ashtu siç edhe Albana u shpreh, dhe ne urojmë shumë që të gjithë nga pak të arrijmë të ndihmojmë vendin tonë në çdo formë, produkt apo ide./revistawho.com
