Noizy është një nga këngëtarët më aktivë në tregun muzikor shqiptar. Kënga më e fundit e realizuar prej tij është një bashkëpunim me reperët, Azet me origjinë nga Kosova, si dhe me Zuan me origjinë nga Libani, por të dy janë të njohur në Gjermani. Mesa duket Noizy ka vendosur të vazhdojë bashkëpunimet me këngëtarë të suksesshëm, por këtë herë ai do të vijë në duet me një femër. Shumë shpejt Noizy do të sjellë një bashkëpunim me këngëtaren e dashur për publikun shqiptar Nora Istrefi. Sipas burimeve të ‘Prive’ kënga është shkruar nga Noizy dhe do të jetë ritmike, si stili i zakonshëm i Norës dhe vetë reperit. Xhirimet për klipin do të nisin së shpejti, ndërsa në muajin tjetër pritet edhe publikimi i këngës. Me siguri ky do të jetë një ndër duetet më të suksesshme duke qenë se publiku e pret prej kohësh një bashkëpunim midis dy këngëtarëve, sepse Noizy ka përmendur më parë Norën në një prej këngëve të tij. /revistawho.com
