Eleni Fouriera është një ndër këngëtaret më të njohura në Greqi dhe Qipro. Ajo ka lindur në Shqipëri, por pas largimit në 1997, ka zhvilluar karrierën muzikore në vendet fqinje. Këtë vit Eleni do të përfaqësojë Qipron në ‘Eurovision Song Contest’. Pavarësisht se me origjinë shqiptare, Eleni, pak vite më parë e ka mohuar origjinën e saj dhe kjo shkaktoi shumë bujë në të gjitha mediat. Megjithatë më vonë ajo tha se e kishte bërë këtë gjë duke qenë se nuk donte të binte pre e racizmit grek, sepse nuk do të mund të ecte përpara.
Por së fundmi në një intervistë për ‘Wiwi Bloggs’, portali që merret vetëm me Festiavalin Europian, Eleni është shprehur krenare që është shqiptare. Kur u pyet se si do ta cilësonte largimin nga Shqipëria gjatë luftës civile ajo u shpreh: “Ishte shumë e vështirë të largohesha nga Shqipëria dhe më pas të nisja jetesën në një vend që nuk e njihja. Por vështirësitë që kam kaluar më kanë bërë kjo që jam sot. Jam krenare që jam shqiptare, që jam rritur në Greqi dhe që do përfaqësoj Qipron në ‘Eurovision’. Muzika lidh njerëzit”.
Festivali Europian i Këngës nis në 8 maj dhe përfundon në 12 maj me shpalljen e vendit fitues. /revistawho.com
