Dasma mbretërore e Princit Harry dhe Meghan Markle ka qenë në qendër të të gjithë mediave botërore. Në mbarë botën flitej për këtë moment historik dhe ky moment erdhi. Meghan Markle mbërriti për të shkuar drejt altarit dhe Princit të saj. Me një fustan të thjeshtë, por në një ngjyrë të bardhë të pastër, Meghan i la të gjithë pa fjalë. Fustanin e bardhë e kishte shoqëruar me një kurorë me diamante dhe një vello që qëndronte mbi fytyrën e saj.
Princi Harry dukej mjaft nervoz dhe i emocionuar, megjithatë kur pa të veshur me fustan bashkëshorten e tij nuk ngurroi t’i dhuronte një buzëqeshje. Jashtë kështjellës qëndronin rreth 100.000 sy kureshtarë që ndoqën me vëmendje të gjithë ceremoninë.
Kjo pritet të jetë një ndër dasmat më të mëdha mbretërore, pas asaj të Princit William dhe Dukeshës Kate Middleton në vitin 2011. Tashmë Meghan Markle do të mbajë titullin Dukesha e Sussex, një titull që nuk është përdorur që nga viti 1843. /revistawho.com
