Këngëtarja Aurela Gace ka një jetë në skenat e muzikës shqiptare dhe ka kënduar këngë që janë futur në historinë e muzikës si hite të pavdekshme. Për miqësinë me kolegët flet shpesh, madje e kemi parë edhe duke mbështetur të rinjtë në përpjekjet e para për të zënë një vend në skenën shqiptare. Patjetër që dimë edhe për miqësinë që ka me disa nga personazhet më të njohur të televizionit siç është Ardit Gjebrea.
Ky i fundit e ka gjetur veten mirë në rolin e moderatorit, por ne kurrsesi nuk mund të harrojmë kontributin e tij si kantautor dhe këngëtar dikur. Pikërisht këtë ka kujtuar Aurela sot, në një dedikim të shkurtër për njeriu që e shikon ‘si shkollë’. Bashkë me njerëzit e tij më të afërt, Arditi ka qenë i pranishëm në skenën ku këngëtarja performon pothuajse çdo natë. Ai nuk ka mundur t’i rezistojë këmbënguljes së saj për ta ngjitur në skenë, si rrallë herë për të kënduar.
Pikërisht kjo gjë e ka bërë këngëtaren e njohur që të shkruajë për privilegjin që ndjeu, por jo vetëm. Ndër të tjera ajo shkruan: “Unë e quaj shkollë, për mënyrën se si ndërton gjithçka. Për marrëdhëniet mes njerëzve, artisteve, miqve, armiqve. Ai është i madh e ndërkohë aq i thjeshtë me secilin nga ne për menaxhimin e aftësive etj. Shkroi muzikë për shpirtin. Disa gjëra duhen thënë dhe unë i them si i ndjej”./revistawho.com
