Erion Isai përpara pak ditësh mori zyrtarisht postin e Drejtorit të Teatrit të Kukullave. Për të folur për këtë ngjitje në karrierë dhe për të gjitha planet e ardhshme,aktori ishte i ftuar në emisionin radiofonik ‘Chaud Patate’. Aktori dhe regjisori ka treguar se është shumë i lumtur me postin e ri dhe po përgatit disa plane për të sjellë një frymë të re në Teatrin e Kukullave.
Megjithatë ai është shprehur se nuk mund të harrojë të shkuarën e tij në ‘Portokalli’, sepse aty ai është krijuar dhe është rritur profesionalisht si artist. Në qendër të bisedës me gazetarët e emisionit ishte dhe projektet e reja të tij së bashku me Bes Kallakun në televizionet kombëtare.
“Siç shikojmë dita-ditës nëpër portale që markatoja po bëhet e ethshme, edhe në këtë pjesë markatoja vijon të jetë e ethshme. Me këtë pjesë po merret Besi, unë jam përqëndruar në detyrë, kam informacion dhe të gjithë jemi duke e menduar, por kaq…”, -tha ai duke e lënë çdo gjë enigmë. Megjithatë Erioni ka shtuar se kanë marrë shumë oferta, por nëse do të nisin një projekt të ri me Besin do të jetë në dy televizonet më të mëdha, ‘Top Channel’ ose ‘Klan’, sepse sipas tij vetëm këta mund t’i përballojnë spektaklet e përmasave të mëdha. /revistawho.com
