Një dasmë, jehona e së cilës ka nisur muaj më parë, kur çifti pranoi publikisht se qershori i këtij viti do të ishte koha kur dashuria e tyre disavjeçare do të zyrtarizohej në martesë. Martesa e modeles Afërdita Dreshaj me sportistin çek Jakub Kindl ka qenë kryefjala e ditëve të fundit.
Festa ka filluar javë më parë me organizimin e festës së beqarisë e cila pati përmasa madhështore, për t’u përmbyllur mbrëmjen e djeshme me ceremoninë e martesës e cila kurorëzoi dashurinë disavjeçare të çiftit.
Mbrëmja filloi me ceremoninë e celebrimit e cila u mbajt në tarracën e hotelit, ku u zhvillua edhe dasma.
Nusja hyri në altar e shoqëruar nga nëna e saj, ndërkohë që mbante veshur një fustan të stilizuar enkas për të, pas trupit, me një vello të madhe. Ashtu siç është kthyer në një traditë tashmë Afërdita kishte edhe shoqërueset e saj midis të cilave motra Jehona Dreshaj, modelja Tika Camaj që është edhe kushërirë e saj, si dhe Xhesika Berberi një ndër mikeshat e saj të ngushta…
Ceremonia u karakterizua nga situata emocionuese për çiftin dhe gjithë të ftuarit, por do të veçonim momentin kur u përmendën babai i Afërditës dhe nëna e Jakub, të cilët nuk jetojnë më.
Pas betimi për dashuri të përjetshme çifti shkëmbyen puthjen e parë si burrë e grua. ‘RevistaWho’ ishte aty dhe ndoqi çdo detaj të dasmës nga afër.
Përsa i përket dekorit ajo që ra në sy ishte mbizotërimi i ngjyrës së zezë kombinuar me të bardhën. Madje edhe torta kishte këtë ngjyrë. Mbrëmja që vijoi deri në orët e para të mëngjesit pati muzikë live nga artistë të muzikës live në Miami, por nuk mungoi as muzika shqiptare përmes DJ-ve.
Afërdita ndryshoi dy fustane, ndërkohë edhe Jakub për darkën kishte zgjedhur një tjetër xhaketë. Festa e dasmës më të përfolur të momentit ka zgjatur deri në orët e para të mëngjesit.
Përgjatë gjithë ditës ‘RevistaWho’ do të publikojë foto dhe video nga dasma./revistaWho.com
