Shenja e shqiponjës që Xhaka dhe Shaqiri bënë në ndeshjen Zvicër-Serbi u kthye në çështjen më të diskutuar në mediat shqiptare dhe botërore.
Pas vendimit që FIFA mori për të gjobitur futbollistët për veprimin e kryer, shqiptarët vendosën të hapnin një numër llogarie me qëllim mbledhjen e kësaj shume e cila edhe e kaloi shifrën e parashikuar.
I fundit që ka reaguar mbi këtë çështje ka qenë babai i vëllezërve Xhaka, Ragipi.
Nëpërmjet një letre publike ai ka falenderuar shqiptarët për veprimin e tyre, ndërkohë mësohet se shuma e grumbulluar do të përdoret për të ndihmuar disa fëmijë në nevojë.
“Shenja e shqiponjës është si një tatuazh i gëzimit të shqiptarëve në festa, në dasma, në koncerte, në ndeshje futbolli dhe nuk ka brenda asnjë urrejtje apo madje asnjë lidhje me të tjerët. Është thjesht një shenjë dalluese që shqiptarët e njohin menjëherë e nuk kanë nevojë për shpjegime.
Prandaj edhe jemi shumë të çuditur me reagimin e atyre që e përjetuan shenjën tonë si ofensivë për ta apo atyre që e trajtuan si gjest politik.
Por nuk jemi aspak të çuditur me solidaritetin e shumë shqiptarëve që janë ndjerë keq nga keqinterpretimet e shenjës dhe kanë marrë pjesë në iniciativën e Edi Ramës për të kontribuar simbolikisht për gjobën e padrejtë që na u vu.
I falënderojmë shumë, jo për shumën po për faktin që na kthyen 20 mijë fish gëzimin që u dhamë me shenjën e shqiponjës pas golave”-ka shkruar Ragip Xhaka. /revistawho.com
