Në ditët e sotme nuk ka videoklip këngësh që të mos shoqërohet me një kërcim modern. Në Shqipëri të tilla grupe kërcimtarësh profesionistë janë të pakët dhe më i madhi ndër ta është ‘Quest Style Crew’. Ky grup është krijuar nga Andi Murra, koreografi më i kërkuar për performancat ‘freestyle’ dhe ‘hip hop’. Pas një pune të gjatë dhe me sakrifica të shumta, Andi arriti që të themelonte dhe një akademi, për të gjithë të rinjtë që kanë pasion kërcimin dhe duan të marrin leksione të vlefshme. ‘Quest Style Crew’ është sot një ndër grupet më të kërkuara, prandaj dhe sukseset e tyre janë të shumta. Në një intervistë ekskluzive për RevistaWho.com, koreografi Andi Murra ka treguar të gjitha arritjet e këtij viti dhe çfarë surprizash ka rezervuar për të ardhmen grupi ‘Quest Style Crew’.
“Gjatë këtij sezoni akademik kemi pasur shumë arritje të rëndësishme për grupin tonë. Një ndër të parat që përmend është hapja e madhe e ‘Këngës Magjike’ Edicioni i 19-të. Ajo ishte një ndër arritjet që pati shumë impakt për grupin tonë. ‘Quest Style Crew’ është i vetmi grup në Shqipëri që performoi në këtë skenë të madhe magjike me 100 kërcimtarë. Por sukseset nuk patën fund për grupin ‘Quest Style Crew’, një tjetër ftesë erdhi për të performuar në hapjen e natës finale në ‘The Voice Kids’. Më pas një super spektakël u realizua nga grupi ‘Quest Style Crew’ në hapjen e madhe të natës finale në ‘Dancing With The Stars’”, – ka treguar Andi Murra rreth arritjeve më të rëndësishme të këtij sezoni. Tashmë ‘Quest Style Crew’ mund të cilësohet vërtet si një akademi profesioniste, sepse numëron mijëra studentë që kanë marrë pjesë në të.
https://www.youtube.com/watch?v=fZ8bPgHmtJI
“Ne akademinë ‘Quest Style Crew’ kanë marrë pjesë 8000 studentë, një shifër rekord në Shqipëri madje gjatë këtij sezoni nga statistikat që u llogaritën, doli se morën pjesë më shume se 500 studentë”, – ka shtuar më tej koreografi.
Andi Murra premton shumë surpriza për sezonin e ri, duke përfshirë video kërcimi profesionale, pjesëmarrje në koncerte dhe videoklipe. Të gjithë profesionalizmin e ‘Quest Style Crew’ mund ta tregojë qartë puna e grupit me pjesëmarrjen e tyre në disa nga videoklipit më të njohura si në atë të Xhensila Myrtezajt dhe Ardian Bujupit, Ronela Hajatit, Stines, Young Zerkës, Noizyt, Bes Kallakut dhe Irkencës Hykës e shumë të tjerë. /revistawho.com
