“U martova me veten time”/ Historia e të sëmurës me kancer që realizoi ëndrrën para vdekjes

Kur dy vite më parë u diagnostikua me kancer, Natalie Adams vendosi të bënte një listë dëshirash që do t’i realizonte para se të vdiste. Ndër to, ishte dhe njëra shumë e veçantë: të parakalonte në Kishë me një fustan të bukur nusërie e të martohej para Zotit, me ose pa bashkëshort. Prej kohësh ajo i përkushtohej 24 orë djalit të saj të vetëm, ishte beqare dhe sigurisht që me sëmundjen iu bë edhe më e vështirë të gjente një partner.  Mirëpo kjo mungesë nuk e ndaloi. Kështu Natalie, anglezja 36-vjeçare arriti ta bëjë realitet ëndrrën e saj. “U martova me veten time, ishte një celebrim me jetën”, ka treguar ‘nusja’ për të përditshmen britanike “That’s Life”. Me të birin Riley përkrah, ajo doli përpara njerëzve të dashur me fustanin e bardhë të mbuluar me perla dhe tha “Po” në altar, një premtim për jetën dhe për familjen. “E kam dëshiruar gjithnjë një ceremoni si kjo. Atëherë i thashë vetes: pse duhet të heq dorë, vetëm se nuk para fatin të kem një dhëndër? Kështu vendosa të bëj një festë në nderin tim në prani të njerëzve që dua më shumë”, ka rrëfyer Natalie. Mjekët i gjetën një masë tumorale në ezofag, afër stomakut. Falë kemioterapisë ajo ka arritur të mbijetojë për thuajse dy vite pas diagnostikimit të sëmundjes, por gjendja e saj nuk është e mirë dhe i ka mbetur pak kohë jetë.