Renato Mekolli është padiskutim një ndër personazhet më të kuotuar të televizionit në Shqipëri. Shefi i kapeleve të arta duket se ka ditur ta menaxhojë shumë mirë emrin e tij, ndaj edhe sot rezulton të jetë më i kërkuari. Me mbylljen e edicionit të tretë të “MasterChef” në fund të të cilit Renato vuri pikat mbi ‘i’ duke thënë se me të do të shiheshim në programe të tjera, nisën edhe ofertat për personazhin karizmatik të “Top Channel”. Kështu ekranet e tjerë të mëdhenj si: “Klan” e “Vizion Plus”, nisën bisedimet për ta pasur shefin e famshëm, pjesë të logos së tyre. Nga burime të afërta pranë tij mësohet se një propozim i ka ardhur edhe nga televizioni ku punoi për tri sezone, por Renato ka bërë tjetër zgjedhje. Patenta e famshme e “Hell’s Kitchen” dhe botimi i librit të tij me receta që erdhën si propozime nga platforma “Tring”, kanë qenë ato që e kanë joshur më shumë djaloshin e buzëqeshur nga Fieri, i cili nga sa mësohet është duke mbyllur një kontratë afatgjatë dhe mjaft fitimprurëse me kompaninë në fjalë. Më shumë se sa me një eksperiencë të re, kjo ngjan me një rikthim në shtëpinë e vjetër, sepse ishte pikërisht “Tring” platforma ku Renato nisi aventurën e tij televizive në Shqipëri.
Dev by Techzero1.com