Mësoni trashëgiminë kulturore, ‘Etno Vibes’ ju pret në Shkodër

Një shoqëri pa identitet nuk mund të ekzistojë dhe kush më mirë se sa trashëgimia kulturore mund ta përcjellë identitetin e vërtetë të kombit. Shqipëria ka fatin që të jetë e pasur me vlera kulturore të çmuara, që me shumë fanatizëm janë ruajtur brez pas brezi. Për të promovuar vlerat shpirtërore dhe artin e bukur, ‘Ti Institute’ për të dytin vit radhazi organizon ‘Etno Vibes’. Në një spektakël të rrallë, i ideuar këtë herë në djepin e kulturës, në qytetin e Shkodrës, ‘Etno Vibes’ do të shpalosë të gjithë elementët artistikë të bazuar në folklor, por të sjella në kontekstin bashkëkohor. 29 shtatori e shpallur si ‘Dita Ndërkombëtare e Trashëgimisë Kulturore’ do t’i dedikohet vetëm traditës, kulturës, stilit, të bukurës. Sigurisht që në Shkodër nuk ka vend më të përshtatshëm se sa ‘Muzeu Kombëtar i Fotografisë Marubi’ për të realizuar këtë eveniment kaq dinjitoz për kulturën shqiptare. Gjithçka do të nisë në orën 11, kur të gjithë artistët pjesëmarrës do të prezantojnë punimet e tyre të frymëzuara nga tradita shqiptare. E më pas një spektakël artistik me këngë, poezi e balet do t’i dedikohet trashëgimisë kulturore në zonën e pedonales së Shkodrës. ‘Ti Institute’ siguron se ky spektakël do të jetë i kuruar në detaj nga një trup profesionistësh, për të sjellë më bukurën e traditës shqiptare në formën më të mirë. Nëse nuk dini ku të kaloni fundjavën, ja ku e keni një ide. Nisuni në Shkodër, ‘Etno Vibes’ ju pret të mësoni gjithçka për vlerat shpirtërore dhe kulturën shqiptare. /revistawho.com