Muaji tetor në mbarë botën njihet si muaji dedikuar sensibilizimit dhe ndërgjegjësimit të popullatës kundër kancerit të gjirit. Pavarësisht se nëse e vuajmë apo jo një sëmundje të tillë, të gjithë duhet të bashkohemi për t’i dhënë shpresë dhe fuqi njëri-tjetrit në të tilla sfida jetësore. Diagnostikimi i hershëm i kësaj sëmundje mund të parandalojë pasojat fatale. Për të dhënë këtë mesazh, në 27 tetor në Tiranë do të organizohet një aktivitet ku të gjithë njerëzit pa dallim moshe apo gjinie do të bashkohen për të ecur ose vrapuar. Nisja bëhet në digën e Liqenit Artificial dhe itinerari përfshin 5 kilometra përgjatë Liqenit të Tiranës. Organizatoret e këtij aktiviteti, Deborah Keci dhe Orgesa Kalemi na tregojnë se “Cohl’s Sportwear”, dhe të gjithë mbështetësit e tjerë do të dhurojnë një bluzë ngjyrë rozë me një mesazh shumë sensibilizues për të gjithë pjesëmarrësit. Regjistrohu tani, si individ, ekip, familje në www.vrapomeshprese.com për të dhuruar shpresë, mbështetje dhe ngrohtësi. Është një regjistrim i shpejtë që ju merr pak sekonda kohë. Bashkohuni për të sensibilizuar të gjithë të prekurit nga kjo sëmundje, për t’u dhënë forcë për të ecur para me gjithë fuqinë e shpirtit, mendjes dhe trupit. Kancerin e gjirit nuk e zgjedh askush, prandaj mjafton një gjest i vogël për të treguar se ka gjithmonë dritë në fund të tunelit. Bëhuni gati që ditën e shtunë ta mbulojmë Liqenin e Tiranës me ngjyrën rozë! /revistawho.com
‘Vrapo me shpresë’, të gjithë bashkë për ndërgjegjësimin kundër kancerit të gjirit
