Cineplexx, kinemaja më e dashur e shqiptarëve që deri më sot ka qenë e vendosur në qendrën tregtare TEG, tashmë do të ketë një vendodhje të re. Me një investim prej më shumë se 2.5 milionë eurosh, Cineplexx i dytë në Tiranë do të vendoset në Qendrën Tregtare Univers (QTU) e cila për shumë vite ka qenë pikë reference për blerjet në qytetet e Tiranës e Durrësit dhe pritet të rikthehet në fundin e vitit me një koncept të ri dhe modern.
Cineplexx QTU do të aplikojë përsëri modelin aktual të kinemasë ‘multipleks’ (me shumë salla), ku secila prej tyre shfaq filma të ndryshëm. 4 salla moderne me një kapacitet prej 600 vendesh në total, do të sjellin filmat më të fundit të ‘Hollywood’ në teknologjinë më të lartë të transmetimit për një eksperiencë edhe më mbresëlënëse.
Çdo sallë do të jetë e pajisur me sistemin ‘RealD 3D’, me projektorët më të rinj ‘Barco Phosphor Laser’ dhe me sistemin e dëgjimit ‘JBL Sound Performance’. Njëkohësisht edhe sallat e Cineplexx TEG do të pajisjen me projektorë të rinj, për t’u siguruar të gjithë kinema dashësve cilësi optimale.
Për ta plotësuar edhe më tej eksperiencën e kinemasë, sallat e reja do të jenë të pajisura me disa lloje të ndryshme ulësesh për më tepër rehati gjatë shikimit të filmit. Kurse për ata që ndihen të dashuruar, një lloj i ri ulësesh “Love Seat”, do të aplikohet në çdo sallë.
Nuk duhen harruar edhe avantazhet që ofron Cineplexx Bonus Card që do të jenë gjithashtu të aplikuara në filialin e ri të kinemasë. Eventet e përmuajshme dhe vëmendja kushtuar familjes do të jetë sërish një pikë kyç edhe në QTU. Të gjithë do munden të përfitojnë, thjesht duhet të zgjedhin vendodhjen që ju leverdis më tepër. Duke filluar nga data 20 dhjetor, Cineplexx QTU do të jetë i aksesueshëm./revistawho.com
