Në kohën e diktaturës, puthja në ekran ishte një tabu që askush nuk guxonte ta thyente. Mirëpo vitet kanë ndryshuar e bashkë me to dhe sistemet. Tashmë çiftet e dashuruara dalin hapur dhe pranojnë se duhen. “RevistaWho.Com” ka zgjedhur t’ju kujtojë disa nga puthjet e personazheve VIP në Shqipëri, që bënë të gjithë shikuesit të marrosen pas tyre.
Soni Malaj dhe Flori Mumajesi
E kush nuk e mban mend vitin 2007, kur “Aeroporti i Rinasit” u zhvendos në “Pallatin e Kongreseve”?
“Fluturimi 3470” ishte kënga himn e çiftit të bukur Soni dhe Flori, që deklaruan dashurinë e tyre. “Le t’i çojmë akrepat e orës në 12 zemër “, ishin fjalët e këngëtarit përpara se të puthte partneren e tij. I gjithë publiku duartrokiti pafund si kurrë më parë. Tashmë çifti nuk janë më bashkë, po gjithçka kujtohet si dikur…
Miriam Cani dhe Alban Skënderaj
E kur jemi te “Pallati i Kongreseve”, Alban Skënderaj vetëm pak kohë më parë ka mbyllur me sukses recitalin e tij “Hapësira e një ëndrre”. Gjatë këtij recitali, përveç këngëve të bukura te Albanit, theksi u vu dhe tek dashuria me partneren e tij, Miriamin. Ata kënduan së bashku, ndërkohë në monitor u shfaq dhe vajza e tyre Ameli. Pas kësaj, çifti shkëmbeu një puthje mjaft romantike dhe Albani e falenderoi Miriamin për gjithçka çfarë ka bërë për të. Aty nuk munguan as duartrokitjet e shumta të publikut.
Amarda Toska dhe Ermal Mamaqi
Ami dhe Ermali mund të cilësohen pa frikë si ndër çiftet më të pëlqyer të ekraneve shqiptare. Çifti kanë dhuruar puthje pafund në shumë emisione dhe kjo ka bërë që të gjithë ata që i ndjekin t’i duan. Ami dhe Ermali janë pa komplekse gjithmonë, ndoshta për këtë ka ndikuar dhe humori që Mamaqi ka. Hera më e fundit që ata shkëmbyen një puthje pasionante për publikun ishte pak ditë më parë kur Ami ishte e ftuar tek emisioin ‘Xing me Ermalin’.
Linda dhe Edi Rama
Kryeministri Edi Rama është diskutuar gjithmonë për jetën e tij private. Kohë më parë ai është bërë baba i një djali, të cilin e ka pagëzuar me emrin Zaho. Mirëpo ajo çfarë zgjoi interes tek publiku ishte martesa me nënën e Zahos, Lindën. Në fillim askush nuk e dinte raportin e tyre të fshehtë, derisa erdhi martesa, e cila u finalizua me një puthje. Puthja u komentua gjatë në media dhe çdo detaj tjetër i dasmës surprizë.
Xhensila dhe Besi
E kur jemi tek puthjet nuk mund të lëmë pa përmendur çiftin e ëmbël Xhensila Myrtezaj dhe Bes Kallaku. Ata pëlqehen shumë nga publik. Por ajo që mbeti në kujtesën e të gjithëve ishte puthja finalizuese, teksa i thanë ‘Po’ njëri-tjetrit. Dasma e tyre kishte kohë që diskutohej në media nga fustani i Xhensilës e deri tek serioziteti që e priste Besin.
Sara dhe Ledioni
Vitin që lamë pas në një nga ceremonitë më madhështore të dasmave VIP, Sara dhe Ledioni kurorëzuan dashurinë e tyre. Me altarin pranë liqenit Como ata u betuan për dashuri të përjetshme. Pavarësisht se gjithçka ishte shumë private, Sara ka ndarë me të gjithë momentin më të bukur të dasmës. Si një foto e shkëputur nga histori përrallash, puthja mes Sarës dhe Ledionit pranë vogëlushit London, është një nga pamjet më të bukurat të historisë së tyre të dashurisë. /revistawho.com
