Pak ditë më parë Jonida Maliqi zbuloi në emisionin radiofonik ‘CityNight Radio Show’ se do të ndërmerrte një nismë për përfaqësimin dinjitoz të Shqipërisë në ‘Eurovision’. Këngëtarja tha se fondet e ‘RTSH’ nuk janë të mjaftueshëm, kështu që ajo do të kërkonte personalisht ndihmë në të gjitha institucionet dhe bizneset shqiptare. Duke qenë se pak nga pak po afron dita për festivalin europian, Jonida ka nisur punën për të kërkuar ndihmën e nevojshme. Ditën e sotme ajo ka treguar se ka dërguar një kërkesë drejtuar kryetarit të ‘Bashkisë së Tiranës’, Erion Veliaj.
‘Eurovision’ luan një rol shumë të madh në imazhin e një shteti dhe prandaj me siguri Jonida do të gjejë mbështetjen e të gjithëve. Disa ditë më parë këngëtarja regjistroi versionin përfundimtar të këngës në një studio në Suedi. Jonida Maliqi do të prezantohet në festivalin europian me këngën ‘Ktheju Tokës’, që do ta këndojë në gjuhën shqipe. /revistawho.com
