Ndarja nga jeta e figurës më të rëndësishme të ‘Chanel’, Karl Lagerfeld, la pas një boshllëk të madh në botën e modës. Personazhet dhe stilistët më të njohur përveçse kanë shprehur publikisht ngushëllimet, kanë kujtuar edhe momentet më të bukura me Karl. Edhe shqiptarja Emina Çunmulaj ka pasur fatin të bashkëpunojë me Karl Lagerfeld, gjatë kohës që punonte si modele. Emina ka publikuar në ‘Instagram’ disa fotografi të viteve të shkuara, në të cilat ajo shihet duke sfiluar me veshjet e ‘Chanel’.
Përkrah fotove ajo ka shkruar dhe diçka mjaft të ndjerë për stilistin, në nderim të figurës së tij. “Ti më thërrisje Maria Callas kur unë as nuk e dija se kush ishte ajo. Çfarë nderi ishte të kaloja gjithë ato vite pranë teje dhe kreativitetit tënd. Faleminderit që ke qenë gjithmonë i njerëzishëm dhe që nuk më trajtove thjesht si një kalimtare, por u interesove për kulturën time dhe që ke ndarë me mua shakatë dhe historitë e tua të udhëtimeve. (Këto janë disa nga fushatat e mia të preferuara ku unë kam sfiluar për ‘Chanel’)”, – ka shkruar Emina. Kujtojmë se Karl Lagerfeld ndërroi jetë ditën e sotme në Paris, por ende nuk janë zbuluar shkaqet e vdekjes së tij. /revistawho.com
