Përkujdesja ndaj fëmijëve në përgjithësi është një punë që i atribuohet nënave prej shekujsh, por sigurisht që në kohët e sotme gjithçka ka ndryshuar. Nuk mund të mendohet më për ndarje të tilla, aq më tepër kur bëhet fjalë për rritjen e shëndetshme të fëmijëve. Kemi parë shpesh baballarë që kujdesen për fëmijët në çdo moment të ditës, duke krijuar kështu edhe një lidhje të ngushtë. Ndonjëherë angazhimet e shumta në punë nuk mund të lejojnë që të jenë gjithë kohës pranë personave më të rëndësishëm, megjithatë mund të gjenden mënyra të ndryshme për të kaluar momente speciale prind-fëmijë. I tillë është edhe rasti i shumë baballarëve të njohur shqiptarë, që shpeshherë sakrifikojnë për t’u kujdesur sa më shumë për të vegjlit e tyre. Për të kaluar momente sa më të veçanta së bashku, ndonjëherë i kemi parë të bëhen njësh me moshën e fëmijëve, duke i shoqëruar në kënde lojërash apo dhe duke luajtur bashkë me ta. Herë të tjera na ka ndodhur t’i shohim duke i shoqëruar në kopësht apo shkollë, apo duke u kujdesur edhe për ushqimin ose detyrat e tyre. Të tilla raste janë të shumta në radhët e personazheve të njohur në Shqipëri dhe mund të shërbejnë si një shembull për të dhënë mesazhin se dhe baballarët kanë një rol të rëndësishëm në përkujdesjen ndaj fëmijëve. /revistawho.com
