Çdo emision që ajo ka moderuar ka qëndruar në majë të shikueshmërisë, kjo dhe falë aftësisë së Arbanës për të tërhequr audiencën. Përveçse shumë elokuente dhe e lirshme përpara kamerave, Arbanën e kemi parë në çdo kohë të kuruar në detaje. Ajo është një ndër imazhet më të njohura televizive dhe sigurisht që pamjes së jashtme duhet t’i kushtojë një rëndësi të veçantë. Një pjesë e veshjeve të saj janë komentuar shpesh, sepse Arbana ka qenë gjithmonë ndër moderatoret e para që ka guxuar të sjellë edhe diçka të re në televizionin shqiptar.
E kemi parë në të gjitha versionet, me veshje serioze të thjeshta, seksi dhe ekstravagante, por gjithmonë është veçuar për stilin e saj. Sot Arbana ka vendosur të na sjell në kujtesë edhe disa nga veshjet e saj më të komentuara ndër vitet e moderimit të ‘Big Brother’.
Ajo që bie në sy janë fustanet e saj, zgjedhja e parë e Arbanës në çdo rast dhe këpucët, ndonjëherë të çuditshme, që jo çdo femër do mund t’i vishte.
Sigurisht që veshja nuk është gjëja kryesore, por Arbana ka pasur në çdo kohë të gjithë komponentët: aftësinë, zhdërvjelltësinë dhe stilin, që e kanë bërë moderatoren më të preferuar të publikut shqiptar. /revistawho.com
