Dy ditë më parë u publikua klipi zyrtar i këngës ‘Ktheju Tokës’, me të cilën Jonida Maliqi do të prezantojë Shqipërinë në ‘Eurovision’. Kënga u prit mjaft mirë nga të gjithë fansat e festivalit europian dhe Jonida ka marrë komente shumë pozitive për vokalin dhe pamjen e saj.
Duke qenë se ‘Ktheju Tokës’ prek një nga plagët më të mëdha të Shqipërisë dhe jo vetëm, emigracionin, shumë njerëz e gjejnë veten aty. Edhe vetë Jonida ka treguar se këtë këngë e ndjen shumë, duke qenë se e ka provuar vetë se çfarë do të thotë të mos kesh njerëzit e afërt pranë vetes. “Emigracioni nuk ka vetëm ngjyrat e vendit tim. Sot ai është një problem botëror. Unë e kam provuar në lëkurën time ç’do të thotë të mos kesh pjesëtarët e familjes nën të njëjtën shtëpi, shtet. Thirrja ime është thirrje shpirti, e të gjithëve, për të qenë bashkë, të lumtur, të rrethuar nga dashuria! Shumë prej jush më kanë shkruajtur dhe e kanë ndjerë këtë këngë në çdo notë, disa të tjerë kanë kuptuar dhimbjen edhe nga xhirimet e videoklipit. Jam e lumtur që e doni ‘Ktheju Tokës’ ashtu si unë”, – ka shkruar Jonida në një postim në ‘Instagram’.
https://www.instagram.com/p/Bu51aEtHr3W/
Këtë vit ‘Eurovisioni’ do të organizohet në Tel Aviv dhe Shqipëria bën pjesë në grupin e gjysmëfinales së dytë. /revistawho.com
