Këtë të dielë, Adrola Dushi ishte e ftuara e radhës në emisionin “E Diell” në “Top Channel”. Ajo ka rrëfyer gjithçka për karrierën e saj si modele, jetën private dhe për miqësinë me miken e ngushtë, Kristina Baki, e cila ishte gjithashtu e ftuar në studio.
Nëse e shikojnë nga rrjetet sociale të gjithë mendojnë se Adrola ka një jetë luksoze, por ajo ka treguar se në fakt është njësoj si gjithë të tjerët dhe luksi ka lidhje vetëm me punën e saj. Adrola ka kujtuar fragmente nga fëmijëria e saj dhe ka treguar se nuk ka qenë aspak fëmijë i përkëdhelur, pavarësisht se ka dy vëllezër më të mëdhenj. “Fëmijëria ime ka qenë si pjesa më e madhe e shqiptarëve. Ndihmoja mamin tek puna që të fitonim lek dhe t’i sillnim në shtëpi. Unë nuk kisha shumë lodra siç ka Troi sot”, – është shprehur ajo. Më tej Dushi ka rrëfyer se kalimi nga Rrësheni në Tiranë ka qenë më e vështirë se sa nga Tirana në Amerikë.
Ajo tha se në fillimet e saj në kryeqytet paragjykohej shumë për shkak të dialektit. “Kam pasur familje shumë fanatike nuk dilja as në Rrëshen. Kur mbërrita në Tiranë mbeta vetëm se familja shkoi në SHBA. Më paragjykonin për të folurën time, por me ndihmën e Kristinës dhe miqve të tjerë tashmë flas në gjuhë letrare. Gjithsesi kur bashkohemi me fisin, lëshohemi fare dhe flasim në gjuhën tonë”, – ka thënë ajo. Tani Adrola jeton mes Tiranës dhe Amerikës për shkak të punës së saj dhe është nënë e një djali 5 vjeç të quajtur Troi. /revistawho.com
