Majlinda Bregu prej pak kohësh mban postin e Sekretares së Përgjithshme të Këshillit të Bashkëpunimit Rajonal. Për shkak të kësaj pune, Majlindës i është dashur të zhvendoset në Sarajevë, vend në të cilin ka një shtëpi dhe zyrë të re. Së fundmi emisioni “My Living” ka udhëtuar drejt Sarajevës, për një rrëfim ekskluziv të Bregut për jetën e saj të re. Majlinda ka hapur dyert e shtëpisë së re, në të cilën ajo jeton me qira, por duket se është e mobiluar me një stil shumë modern.
Ajo ka treguar se konkurroi për të fituar vendin e ri të punës, që për të thënë të vërtetën nuk është aspak i lehtë, për shkak se i duhet të qëndrojë për shumë ditë larg familjarëve të saj. Bregu ka rrëfyer se as për të e as për fëmijët dhe bashkëshortin nuk është e lehtë të jetojnë larg njëri-tjetrit, por deri më tani ja kanë dalë mbanë. Për një grua kaq të suksesshme të gjithë jemi kuriozë se cili është personi që admiron dhe që e ndjek si shembull dhe për Majlindën duket se janë disa.
Ajo ka treguar se admiron nënnë e saj për gjithë pozitivitetin që përçon, babain për përkushtimin ndaj familjes dhe nuk ka lënë pa përmendur edhe prindërit e bashkëshortit. “Më kanë bërë habi prindërit e tim shoqi. Thosha si ka mundësi njerëz që kanë vuajtur në burgje, në internime, i kanë masakruar, i kanë vrarë vëllezërit dhe nuk kanë parë vëllain se është arratisur, kanë pasur një vullnet dhe dëshirë për të parë përpara. Këtë mungesë të sensit të hakmarrjes nuk e shoh as tek im shoq. Pra në njerëz të ndryshëm gjej vlera të ndryshme”, – ka thënë ajo. Kujtojmë se Majlinda Bregu është nënë e dy fëmijëve dhe pak vite më parë ka pasur poste të rëndësishme në politikën shqiptare. /revistawho.com
