Aurela Gaçe është një nga këngëtaret më të dashura të skenës shqiptare, kjo për shkak të karrierës së saj tepër të gjatë dhe vlerave të mëdha vokale. Në vitin 2011, Gace ka përfaqësuar Shqipërinë në festivalin e përvitshëm të ‘Eurovision’ me këngën ‘Feel The Passion’.
Së fundmi ajo ka kujtuar me anë të një postimi në ‘Instagram’, një nga momentet më të veçanta gjatë kësaj eksperience. Aurela ka ndarë me të gjithë ndjekësit e saj një video ku duket se është duke kënduar një nga këngët e polifonisë së vendit tonë, në sallën gjermane, bashkangjitur së cilës ka shkruar: “Në 2011, kur përfaqësova Shqipërinë në ‘Eurovision’, nuk ishte boom-i kaq i madh i ‘Instagram-it’ dhe mediave sociale. Shumë gjëra dhe i kanë mbetur kohës, por ja ka dhe arkiva nga ato që të emocionojnë gjithmonë. Në sallën gjermane të ‘Eurovision 2011’ më kërkuan të këndoja diçka unike dhe nuk e mendova dy herë. Polifonia jonë është trashëgimi kulturore dhe krenari. E dini ju, të tillë tinguj janë ata të shpirtit”.
Gaçe ka kujtuar me nostalgji një nga momentet më të veçanta të eksperiencës së saj në ‘Eurovision’ me anë të kësaj videoje të rrallë. Në të nuk kanë munguar si gjithmonë komentet pozitive nga të gjithë ndjekësit e këngëtares.
Kujtojmë se kënga më e fundit që Aurela ka sjellë, ka qenë bashkëpunimi me miken e saj, Eli Fara, me titull ‘Zemra Rratatata’, e cila u pëlqye dhe u kthye në një hit menjëherë./revistawho.com
https://www.instagram.com/p/Bw4rMG2gqou/
