Mbrëmja e 1 majit ka bërë bashkë dy nga artistët më të njohur për publikun shqiptar, Soni Malaj dhe Majk. Soni ka mbajtur kështu recitalin e saj të parë në amfiteatrin e Tiranës, me një ambient të mbushur nga të gjithë adhuruesit e këngëtares ndër vite. Malaj dhuroi performanca unike pranë balerinëve, të cilët shoqëronin me koreografi çdo këngë të Sonit. Ajo çfarë ra tjetër në sy ishte energjia e pashtershme e këngëtares, e cila bëri që gjithë salla e amfiteatrit të ngrihej në këmbë për të kënduar dhe kërcyer së bashku me të.
Malaj interpretoi disa nga hitet më të fundit që ka nxjerrë në treg, por nuk la pas dhe baladat të cilat kanë ngelur thellë në memorien e njerëzve si ‘Shpirti im binjak’, ‘Të dua ty’ apo ‘Përgjithmonë’. Zërat e publikut shoqëruan këngëtaren e dashur gjatë gjithë kohës, duke kënduar së bashku me të, por dhe duke brohoritur me entuziazëm performancat unike që dhuroi.
Detaji tjetër që tërhoqi vëmendjen e të gjithëve ishte se Soni ishte kujdesur që çdo këngë e saj të shoqërohej me koreografitë perfekte së bashku me balerinët, duke mos bërë asnjë dallim nga yjet ndërkombëtarë. ‘Look-u’ i këngëtares i mahniti të gjithë, ku si gjithmonë me shumë hijeshi dhe një pamje të kuruar deri në detaje, bëri që gjithë sytë të përqendroheshin tek ajo.
Majk gjithashtu arriti të ngrinte në këmbë gjithë amfiteatrin me hitet e tij ndër vite. Ashtu si në çdo dalje të tijën publike, reperi i surprizoi të gjithë me performancën live dhe plot energji.
‘1 në 1 milion’, ‘Çikita’, ‘Pasha jetën’ e deri tek hiti i tij më i fundit ‘ Sa gjynah’, ishin këngët që Majk interpretoi duke bërë të mundur që të rinj e të ‘vjetër’, të vegjël apo të rritur, të kërcenin së bashku me të.
Spektakli i dhuruar nga dy artistët fantastikë u mbyll me falënderimet e gjithësecilit për pjesëmarrjen, megjithatë dje duhet të ishim ne ata që njëzëri duhet të thonim: “Faleminderit Soni dhe Majk. Zemrat tona u çuan peshë edhe njëherë, vetëm falë jush”./revistawho.com
