Videoklipet janë një ndër elementët kryesorë në karrierën e çdo artisti, prandaj të gjithë mundohen që nëpërmjet tyre të lënë gjurmë. Dikush zgjedh t’i realizojë në formën e një minifilmi, dikush guxon me anë të veshjes së përzgjedhur, ndërsa disa të tjerë me anë të elementeve shumë të vogla në dukje, por që bëjnë diferencën. ‘RevistaWho.Com’ ka zgjedhur t’ju prezantojë sot me disa nga rastet kur kafshët morën vëmendjen e gjithë këngës.
Më i fundit është rasti i motrave Istrefi, të cilat në projektin e tyre muzikor me titull “Nuk e di” morën vëmendjen e merituar për macen e përzgjedhur.
Ndonëse videoklipi ka arritur më shumë se 1 milion klikime në ‘YouTube’, në mediat rozë më shumë u fol për macen e zezë, çmimi i së cilës varion nga 20.000 dollarë në 100.000 dollarë. Kjo mace konsiderohet të jetë një ndër më të shtrenjtat dhe më të rrallat në botë.
E kur jemi tek macet, ajo që e nisi këtë risi në videoklipet shqiptare ishte Julka. Në vitin 2005 këngëtarja publikoi videoklipin “Amin”, personazh kryesor i së cilës ishte një mace. Edhe vetë Julka kishte hyrë në petkun e saj, nga ‘look-u’ dhe pasthirrmat në refrenin e këngës. Një zgjedhje e guximshme për kohën do të thonim.
Greta Koçi është një nga artistet që ka dy videoklipe ku shfaqet në praninë e qenit. Në fillim në “Nuk ta kam thënë” ajo është në rolin e një vajze që vuan për dashurinë dhe qeni e shoqëron në dhimbjen e saj. Ndërsa në rastin e dytë, Greta shfaqet në bashkëpunimin me Gbmc, në këngën me titull “What’s up”. Sharmit të saj i shtohet dhe prania e qenit.
Këngëtarja Eranda Libohova përveç se zgjodhi që në videoklipin e këngës “T’kam tregu” të kishte protagonist një qen, vendosi që të tregonte dhe një stil të veçantë të saj që nuk e kishim hasur më herët. Kjo dalje i pëlqeu publikut, aq sa mbeti dhe një kujtim i bukur për Erandën, e cila ‘mikun’ e saj në jetën reale e prezantoi me publikun për herë të parë.
Libohova një perzgjedhje të tillë e ka bërë edhe vite më herët në këngën “Të ndjej”, por nuk ishte e njëjta ndjesi…
“C’kemi” ishte videoklipi i parë i Alban Ramosaj që shërbeu si trampolinë për skenën shqiptare. Vajzat jo vetëm që u dashuruan me djalin romantik, zërin e tij dhe bukurinë, por u magjepsën me skenat e veçanta në klip. E kush nuk i tha Albanit “Çkemi” pasi pa atë vajzën buzë detit teksa luan me qenin, ndërkohë që vështrimi pasionant i këngëtarit e ndjek. Nuk e dimë nëse magjia e këtij videoklipi i dedikohet Albanit, vajzës apo qenit…/revistawho.com
