Muzika e viteve ’90 ka sjellë revolucion në kulturën shqiptare dhe prandaj brezi i atyre viteve i kujton me nostalgji këngët e asaj kohe. Megjithatë këto këngë nuk janë lënë në pluhurin e harresës, sepse dhe brezi i ri vazhdon t’i dëgjojë ende dhe sot e kësaj dite. Muzika më e bukur e viteve ’90 nuk mund të shuhet lehtë edhe për shkak të iniciativave të shumta për t’i risjellë dhe rikujtuar edhe njëherë ato kohë të arta. Pas “Albanian Pop Rock 90’s” dhe “Albanian Pop Rock Ladies”, gazetarja Kozeta Kurti ka menduar që të organizojë sërish një koncert të përmasave të mëdha për të gjithë ata që kanë nostalgji për ‘pop-in’ dhe ‘rock-un’ e vjetër shqiptar. Në 2 qershor në “Amfiteatrin e Tiranës”, koncerti “Albanian Pop Rock Duets” do të mirëpresë çdokënd që dëshiron të dëgjojë edhe njëherë duetet më të mira të muzikës së lehtë shqiptare deri në fund të viteve ’90, që vazhdojnë të mbeten hite të “pavdekshme”. Në repertor do të jenë të përfshira këngët nga Aurela Gaçe dhe Aleksandër Gjoka, Sabri Fejzullahu dhe Ledina Çelo, Irma dhe Eranda Libohova, Fitnete Tuda dhe Vlera Kastrati etj, të cilat do të sillen me një orkestracion të ri. Këngët e përzgjedhura do të interpretohen nga një gjeneratë e re artistësh si: Orgesa Zaimi, Evi Reçi, Kamela Islamaj, Era Rusi, Mateus Frroku etj.
Këtë herë krijuesit e këtyre këngëve të arta të muzikës shqiptare do jenë spektatorë të radhëve të para, duke ndjekur me emocion se si kënga e tyre mund të jetojë gjatë në kohë e të zërë vend në breza të rinj. Një ngjarje e tillë kulturore nuk duhet humbur, prandaj duhet të nxitoni për t’i blerë biletat në sportelin e Amfiteatrit të Tiranës, ose për t’i rezervuar në myticket.al. Për çdo paqartësi mund të kontaktoni në numrin e telefonit: 0674055500. /revistawho.com
