12 vite bashkë, martohen zyrtarisht Miriam Cani dhe Alban Skënderaj

Miriam Cani dhe Alban Skënderaj janë një ndër çiftet më të pëlqyer të ekranit shqiptar. Ata kanë spikatur gjithmonë për thjeshtësinë dhe seriozitetin që i ka karakterizuar. Edhe pse prej 12 vitesh bashkë dhe prindër të një vajze, çifti nuk kishin lidhur ende kurorë. Mirëpo, një lajm i bukur vjen mëngjesin e sotëm nga dyshja e këngëtarëve. Ata i kanë thënë ‘Po’ njëri-tjetrit në një ceremoni në ishujt Maldive, pikërisht në vendin ku Albani i propozoi Miriamit në vitin 2013.

Ky moment i veçantë nuk do të ngelet vetëm në kujtesën e tyre, por edhe të vogëlushes Ameli, e cila ka qenë prezente kur prindërit e saj kanë shkëmbyer unazat. Përmes një statusi të ndjerë në ‘Instagram’, çifti kanë publikuar edhe fotot e para si burrë dhe grua.

‘PO!
U deshën 12 vite që të quheshim zyrtarisht Burrë e Grua por në zemër kemi qenë dhe jemi ende ata dy të rinj ëndrrimtarë që përtej ceremonive gjithmonë e kanë ndjerë thellë në shpirt se janë bërë për njëri-tjetrin.
U deshën 12 vite të thonim ’PO’ përpara Zotit dhe njerëzve që na duan por ne te vertete zemrat kane thene pergjithmone ‘PO’ nga momenti i puthjes së parë!
U deshën 12 vite të vishnim kostumin dhe fustanin e nusërisë e të shkëmbenim unazat kur ndërkohë kemi jetuar nën lëkurën e njëri-tjetrit çdo gëzim e hidhërim dhe kemi ndarë çdo të mirë e të keqe që jeta na ka ofruar.
Fati dhe shpirti donin që ky moment i shënuar të merrte jetë pikërisht aty ku ne vitin 2013 ai propozim i pazakonteë na la për pak pa frymë te dyve, por këtë herë jo në botën e magjishme nënujore por vetëm pak metra më larg, në sipërfaqen e një ishulli të pabanuar. Një pikë e bardhë në mes të oqeanit. Zhveshur nga të gjitha dekoret e krijuara nga dora e njeriut dhe veshur nga bukuritë përrallore që ka krijuar dora e Zotit.
Duhet të prisnim 12 vite që kjo ditë të merrte kuptimin e plotë të saj me prezencën e engjëllit tonë, Amelisë.
PO … deri sa vdekja të na ndajë!
7 Maj, 2019’, janë fjalët e çiftit.