Diellza Kolgeci u bë nënë pak javë më parë e një vajze dhe prononcimet e saj kanë qenë të pakta, por së fundmi ish-Miss Kosova ka dhënë një intervistë për ‘Telegraf’ duke rrëfyer disa nga përjetimet e kësaj periudhe. Ajo rrëfeu pa u stepur se këto momente janë shumë të frikshme për të. “Është ndjenjë që vërtet vështirë mund të përshkruhet, por mund t’ju them që jam duke kaluar momentet më të rënda të jetës time pasi dua që çdo gjë të bëj perfekt dhe në të njëjtën kohë momentet më të lumtura të jetës time, aspak e lehtë netët pa gjumë e lodhur, por gjatë ditës Helena më jep një super energji”,-u shpreh ajo.
Ndërsa më tej, Diellza është shprehur se ka një fizik shumë të mirë edhe pas lindjes, por nuk është munduar për ta arritur, pasi regjimi i rregullt që ka pasur gjithmonë e ka ndihmuar. “Është shumë interesante që as gjatë shtatzënisë nuk kam menduar aspak për vijat e trupit pasi kurrë nuk kam pasur problem me fizikun dhe kam konsumuar ushqime të shëndetshme gjë që e bëj tërë jetën dhe menjëherë pas lindjes mund t’ju them që barku im ishte gati njëjtë si para shtatzënisë. As vetë nuk e kam besuar dhe menjëherë si jam lëshuar nga spitali të nesërmen isha në televizion, edhe pse lindjen e kam bërë natyrale”,-rrëfen bukuroshja.
Kujtojmë se Diellza është e lidhur me Fisnikun, basketbollist i njohur kosovar dhe marrëdhënia me të vetëm bëhet më e fortë. Pasi krijuan familje, janë duke menduar edhe për një dasmë, e cila ende nuk dihet kur do realizohet. /revistawho.com
