Alban Skënderaj, fotot prekëse krah të varfërve dhe mesazhi i fortë që përcjell 

Kantautori i dashur shqiptar, Alban Skënderaj, i është bashkuar nismës së “Fundjavës Ndryshe”, duke u bërë kështu i disati ndër personazhet publike që kontribuon për familjet në nevojë. Babai i Amelit, që i thotë gjithmonë “PO” nismave me natyrë humane, ka vizituar sot një familje të varfër në periferi të Tiranës. “Edhe pse nuk do preferoja ta postoja ndihmën time shumë modeste, e bëj sepse është një nga pak mënyrat që janë për të sensibilizuar njeri-tjetrin dhe të kujtojmë që ka shumë njerëz në vendin tonë që kanë vërtetë nevojë për gjërat elementare të jetës. Është e vërtetë, ne ndoshta nuk e ndryshojmë dot botën por më mirë të bëjmë aq sa mundemi që të lehtësojmë dhimbjen se sa të mbyllim sytë e të pretendojmë se jetojmë në një parajsë imagjinare. ‘Fundjava Ndryshe’ më mahniti për prakticitetin që ka ndërtuar për të ndihmuar njerëzit, me ushqime, rroba, lodra, ilaçe, sende të përdorura etj, duke krijuar një urë lidhëse midis njerëzve që duan të ndihmojnë dhe familjeve në nevojë”, – ka shkruar Skënderaj në faqen e tij zyrtare, duke ftuar kështu të gjithë ndjekësit e tij të kontribuojnë sado pak.